Skywalk siam chhunzawm leh tum a ni ; Ropeway siam chhunzawm tum a ni lo

Tourism department chuan Sakawrhmuituai tlanga skywalk siam hna ṭan tawh chu chhunzawm an tum a, Chaltlang leh Durtlang inkara ropeway siam hna erawh chhunzawm an tum lo thung.

Tourism department aṭanga Vanglaini thu dawn danin, ropeway component hi Ministry of Tourism chuan December 2019 khan a titawp tawh a, chuvang chuan thawh chhunzawm tum a ni lo.

Sakawrhmuituai tlanga skywalk siam ṭan tawh erawh chu siam chhunzawm tum a ni a, mahse, tun dinhmunah chuan hna chhunzawm theih a ni rih lo. Contractor-te nen buaina chingfel turin arbitration kalpui mek a ni.

Hetih lai hian, ropeway leh sakywalk siamah hian complaint a luh avangin Lokayukta chuan a zirchian hnuah chhui chiang turin Anti Corruption Bureau (ACB) a ruat a; Vanglaini-in thu a dawn hnuhnung berah chuan Lokayukta hian ACB report thehluh hun an nghak mek a ni.

MNF party-a Vigilance depart­ment leh Legal Board-te chuan November 22, 2021 khan skywalk leh ropeway siamnaah thil dik lo a awm nia ngaiin Lokayukta-ah complaint an thehlut a; skywalk leh ropeway siam tura nodal department - Tourism department pawhin Lokayukta-ah vêk chhui chiang tura ngenna February 3, 2022 khan an thehlut ve leh bawk.

Lokayukta chuan, MNF complaint thehluh chu a chhui chian hnuah ACB-te'n an chhui zui turin thutlukna a siam. ACB chuan December 7, 2021 khan chhui phal dilna Mizoram sorkara Vigilance department-ah an thehlut a; Vigilance-in an zir chian hnuah December 17, 2021 khan chhui phalna tichhuakin, ACB chuan December 22, 2021-ah chhui phalna lehkha an dawng.

Tourism department pawhin skywalk leh ropeway chungchang chu chhui chian ṭha an tih thu an Director hmingin February 3, 2022 khan Lokayukta-ah an thlen a; chhui ṭul an tih chhan te, contract agreement te, contract amount te, rinhlelh an neih leh neih lohte leh thil dang dang Tourism department-ah an zâwt lêt a ni.

Tourism department chuan Lokayukta zawhna hrang hrangte chu an chháng a; rinhlelh an neih leh neih loh zawhnaah erawh chuan, rinhlelh mimal/ company tarlan an nei lo a ni.