MZU Southern Campus chungchangah Minister-in sorkar laipui a dàwr

Higher & Technical Education (HTE) minister Dr R Lalthangliana chuan nimin khan Union Human Resources Development changtu minister of state Dr Rajkumar Ranjan Singh chu a pisaah a hmu a, Mizoram University Southern Campus din chungchang a sawipui.

Dr R Lalthangliana chuan, MZU Southern Campus atana sorkar laipuiin January 2020-a notification a tihchhuah tawh chu sorkar laipuiin a bawhzui muang a tih thu leh harsatna thar awm leh chungchang a sawi a, "Mizoram sorkarin university dinna tur ram a tifel vek tawh a ni," tiin, chak taka hmalakpui turin Union Minister a ngen.

Dr Rajkumar Ranjan Singh hian Mizoram University Act, 2000-ah MZU campus/centre dang hawn phalna dan a awm tih a hriatin MZU vice chancellor Prof. KRS Sambasiva Rao chu telephone-in a be nghal a, e-mail hmanga rang taka thawn nghal turin a hrilh. MZU Act tlawhchhanin theihtawp chhuaha hmalak a nih tur thu HTE Minister a hrilh.

Dr R Lalthangliana hian Union Minister hnenah RUSA chung­changa India ram puma harsatna tawh dan leh a nghawng awm theihte a sawipui a, RUSA 3.0 kalpui turin a ngen.

Union Minister-in ruahmanna a siamsak angin HTE Minister hian Ministry of Education-a joint secretary Saumya Gupta chu a pisaah a hmu nghal a; Mizorama RUSA 2.0 hnuaia harsatna an tawhte chinfel dan ngaihtuah rang tur leh RUSA 3.0 tihhlawhtlin a ṭul thu a thlen.

Saumya Gupta chuan, RUSA 3.0 guidelines duan mek a nih thu leh peih a nih veleh Union Cabinet meeting-ah thlen a nih tur thu a lo hrilh a ni.

Commerce & Indus­tries minister Dr R Lal­thang­liana hian External Affairs minister of state Dr Rajkumar Ranjan Singh hnenah hian Bangladesh Commerce minister Tipu Munshi-a'n April 2022-a Mizoram a tlawh ṭuma thuchhuah inṭâwm an siam copy pein, hma lakpui tur leh Bangladesh sorkar dàwr­sak turin a ngen nghal bawk.