State Anti-Tobacco Day hman a ni

National Tobacco Control Programme, National Health Mission leh Indian Society on Tobacco & Health (ISTH), Mizoram chuan nimin khan Vanapa Hall-ah State Anti-Tobacco Day an hmang a, Health & Family Welfare Board vice chairman Dr ZR Thiamsanga, MLA-in a hmanpui. Thupui chu 'Zûk leh hmuam laka zirlaite venhim' tih a ni.

Dr ZR Thiamsanga chuan, vaihlo zûk leh hmuam ti nasa zingah Mizoram hming a la lang reng tih sawiin, vanduaithlak a tih thu a sawi a, "Hmasawn a ṭul. Zûk leh hmuam hi hriselna tichhetu a nihzia hriat thar fo a, inthiar fihlîmsan a pawimawh," a ti.

Zûk leh hmuam vanga hriselnain a tawrh theih dan sawiin Dr Thiamsanga chuan, "Zûk leh hmuam tel lo hian a awm theih a, zûk leh hmuam lei nan sum ṭhahnem tak kan khawhral ṭhin hi pawi," a ti a; zûk leh hmuam laka fihlim turin mipui a chah.

NHM mission director Dr Eric Zomawia chuan, zûk leh hmuam ṭhat lohzia inzirtir a pawimawh thu te, hmalakna kal mek te, natna inkai chhàwn theih loh (non communicable disease) leh nunphung hrisel neih a pawimawh thute a sawi. Sorkar department dangte nen Mizorama zirna-in zawng zawng 100% Tobacco Free Educational Institution (ToFEI) an nih theihna turin chak zawka hmalak a pawimawh thu a sawi bawk.

Anti-Tobacco Day hmanna inkhawm hi Health & Family Welfare additional secretary H Vanlalchuangi'n a kaihruai a; ISTH Mizoram secretary R Lalthakima, School Education director Dr H Lalthlangliana leh ISTH Mizoram executive member Dr Lalbiakkima ten thu an sawi. Anti-Tobacco Day hi district dangahte pawh hman a ni.

Lawngtlai district National Tobacco Control Programme (NTCP) pawhin nimin khan DIET, Thingkahah Mizoram State Anti-Tobacco Day vawi kuana an hmang. Lawngtlaiah hian Tobacco Free Insitution-a puan tawh zirna-in 10 a awm.

Inkhawm kaihruaitu DIET principal Ngur Hming Liani Chinzah, Anti-Tobacco Squad member chuan, DIET-a zirlaite chu zirtirtu tur an nih avangin zûk leh hmuam laka zirlaite ven him pawimawhzia an zir lâwk a ṭul thu a sawi a, DIET huam chhungah zûk leh hmuam khuahkhirh tlat a nih thu a sawi bawk.

NTCP district nodal officer Dr S Thaizi tarlan danin, Global Youth Tobacco Survey 2019-in Mizorama zirlai 1,401 zinga zirchiannaah, zirlai zinga 58% chu zûk leh hmuam laka fihlim lo an ni.

Inkhawmah hian NTCP counsellor Vanlalngheta kaihhruaiin zirlaite'n zûk leh hmuam laka fihlim tura intiamna an sawi rual a; DIET, Lawngtlai chu zûk leh hmuama fihlim zirna-in, Tobacco Free Institution-ah puan nghal a ni.

State Anti-Tobacco Day hi kum tin September 11-ah hman ṭhin a ni a, kuminah Pathianni a nih avangin nimin khan hman a ni.