Poshan Maah pualin Indigenous Toy Fair

Rashtriya Poshan Maah (National Nutrition Month) hman mek pualin Women & Child Development (WCD) department chuan September 10, 2022 khan Chaltlang YMA Branch-a A-1 Section-te nen ṭangkawpin Chaltlang YMA Hall-ah Indigenous Toy Fair an buatsaih a, WCD director Lallianpuii khuallian a ni.

Indigenous Toy Fair-ah hian Mizo infiamna hrang hrang leh naupang inkhualtelemna hmanruate pho lan a ni a, Mizo infiamna chi hrang hrang hmangin intihhlimna hun hman a ni.

WCD director Lallianpuii chuan, Rashtriya Poshan Maah chu Ministry of Women & Child Development hnuaia kalpui a nih thu leh kum tin September thla chhung hman ṭhin a nih thu a sawi.

Lallianpuii chuan, kumina Poshan Maah thupuite chu - hmeichhia leh hriselna tih te, naupang zirna leh chawṭha tih te, tui humhalh leh tribal-te an hnam ei leh in tur neihte hmeichhia leh naupang tan tihte a nih thu a sawi a; Poshan Maah puala hriselna leh ei tur ṭha ei kawnga beihpui thlâknaah YMA chu páwl lian leh chak tak a nih avangin thawhpui zel an duh thu a sawi bawk.

Indigenous Toy Fair-ah hian Mizo infiamna hmanrua leh infiamna - inkawibah, invàwr, kawihbu kaih, kalchhet leh innàpte entir a ni a, pawnto dan chi hrang hrang entir a nih bakah, Chhurbûra lemchan entir a ni.