Mahni thuin mi 150 an rawn haw Sorkar ruahmanna an tikhaihlak

Home department chuan, India hmarchhak state palia Mizo tangkhangte hruai hawna turah, Mizoram House thuneitute leh YMA hruaitute hnena inhriattir tur tih a nih laiin, inhriattir loa haw ve ringawt mi 150 an awm thu an tarlang a, "Hei hian state sorkar ruahmanna siam­te a tiṭhuanawp nasa hle a ni," an ti.

Sorkar hian a haw tur zat in-report milin quarantine-na tur hmun a siam a, an riahna tur leh ei leh in tur thlengin a ruahman a, mahni thua hawte hian chu chu nasa takin an tibuai a ni.

Home department chuan, hmarchhak state-ah Mizo tangkhang an la awm tih hriat a nih thu tarlangin, "La tangkhang mekte hi mahni duh thuin tu mah lo haw rih lo tura hriattir an ni," an ti a; an tangkhanna state-a Mizoram House-a deputy resident commissioner-te emaw, YMA president-te emaw hnena inhriattir turin an chah.

Mizoram sorkar aiawh leh YMA awm lohna state-ah chuan email co­vidstrandedmz@gmail.com ah hming leh kum, pa hming, Mizorama address, tangkhanna state leh khaw hming, tangkhan chhan, EPIC/Aadhaar number, phone number, motor neih leh neih loh, mahnia motor inngaihtuah theih leh theih lohte tarlang turin an chah bawk.