MNF leh Congress-te'n mipui an hmangaih lo - Lalduhoma

ZPM leader Lalduhoma chuan, Assembly session hnuhnung bera pawm tâk The Mizoram (Land Revenue) (Amendment) Bill, 2022 chu mipui chanvo aṭanga chan-ai neih ve tumna dan a nih thu leh, MNF leh Congress party-te'n mipui an hmangaih lo a, mipui hmakhua an ngaih loh thu a sawi.

Nimina ZPM chhung in­khawm­ah Lalduhoma chuan thu sawiin, The Mizoram (Land Revenue) (Amendment) Bill, 2022 chungchang a sawi a, "Mipui chanvo aṭanga chan-ai neih ve tumna dan a ni. Kan mimal pawisa Mizoram sorkarin heti zat hi kan lo hmang ve ang, tih ringawtna dan hi a huatthlala a, a dik lo hrim hrim. Hetiang dan ṭha lo tak siamtu hi Congress an ni a, a hmangtu leh a aia nasa lehzuala dah ngheh tumtu chu MNF an ni. Heng party pahnih hian mipui min hmangaih lo a, mipui hmakhua an ngai lo," a ti.

Lalduhoma chuan, The Mizoram (Land Revenue) (Amendment) Bill, 2022-ah bung 75(A) tih loh a dang zawng zawng chu ZPM party-in an pawm vek tih sawiin, "Dan pass a niha a ṭhat turzia, LSC nei lo pawhin property card an nei thei tawh a, loan an la thei tawh dawn a ni, tihte pawh kha a ṭha," a ti a; MNF sorkar siam anga an sawi erawh chu a dik lo a, sorkar laipui dan siam sa an lâk chhâwn (copy) a nih thu a sawi.

ZPM-in an duh loh chu, ram neitu ni si lo - politician leh official zingah zangnadawmna dawng tura inrawlh an awm ṭhin chu a ni tih sawiin Duhoma chuan, "Dikna kengkawhtu tura ngaih kan ram hruaitute compensation dawnna tur lam apianga an kal a, Revenue Minister hoa hetianga an thuneihna hmanga ram neitu ni lote'n an dawn ve theihna tur kawng an zawng vak hi kan duh lo a, kan hua a ni," a ti.

ZPM Leader chuan, Lunglei Lunglawna PWD ram chu land lease a thih tawh avangin tihnun tumin Revenue office-ah buaipui mek a nih thu a sawi a, "An buaipui mek lai chuan Lunglawn pa pakhatin a mimal ram atan a dil a, kan Minister hian a recommend a ni. Kan Minister hian PWD hi a chhuhsak dawn nge, PWD tan a pe leh dawn? PWD hian an ram an chán dawn nge tih pawh a hriat tawh loh," a ti bawk.

ZPM chhung inkhawmah hian Aizawl South-III bial aṭangin mi 37 ZPM-ah party president Lalliansawta'n a lawm lut niin ZPM thuchhuah chuan a tarlang.