Lui humhalhna tur dan duan sawiho

Sub-Committee on Draft Mizoram River Protection Bill chu an chairman C Lalrinsanga, Agriculture minister hoin nimin khan a pisaah an ṭhukhawm a, Draft Mizoram River Protection Bill chungchanga hmalakna turte an sawiho.

C Lalrinsanga chuan, Mizorama lui leh lui dung humhalh chu tihmâkmawh leh tun dinhmuna thil ṭul tak a nih thu sawiin, "Sorkarin theihtawp chhuahin draft bill buatsaih nan ngaihtuahna hrang hrang a vawm khawm mek. Irrigation and Water Resources department kaltlangin National Hydrological Project hnuaiah Mizorama lui hrang hranga tui tam dan leh a luan chak dante teh a ni a, record mek a ni," a ti.

Aizawl leh Lungleiah data lâk khawmna centre a awm thu sawiin Minister chuan, "Data en hian lei chhunga tui in re-charge zat a hriat theih vek a, chungte ngaihtuah chuan kan ram lui humhalh a ṭul tak zet," a ti a; thil ṭul leh tih tur tam tak a la awm thu a sawi.

Ṭhutkhawmah hian Sub-Committee secretary Lalmuanzova, PHE secretary bakah, department hrang hrang aiawh te, Central YMA general secretary Prof. Lalnuntluanga leh mi pawimawh dangte an tel a ni.