Congress Bhavan-ah crusade buatsaih

Mizoram Pradesh Congress Committee (MPCC) chuan nimin khan Congress Bhavan-ah 'Pathian siamthar lehna crusade’ hun an buatsaih a, Rev. Vanlalzuata'n thuchah a sawi. MPCC chuan, an party chuan Thawhṭanni apiangin Pathian biak inkhawm leh ṭawngṭai rualna hun an hmang ṭhin tih an tarlang.

Rev. Vanlalzuata chuan, Sam 37:3-ah, 'Lalpa chu ring la, thil ṭha ti rawh; he ramah hian awm la, rinawmna ûm zel rawh,' tih a nih thu sawiin, "Khawvela natna tam ber chu rinawm lo natna, mi rinawm lote avangin mi tam tak an ná a, mi nunah kan na ṭhin. Rinawm lohnain kan ram, kohhran, political party leh mipui min tina ṭhin. Mi rinawm lo chuan thil ṭha ti mahse rin a hlawh tak tak thei lo," a ti.

Thil hmuh leh sawi dan inang rengah mi rinawm lo chuan thil dik a hmuh leh a hriat sawi mah se, awih a hlawh ngai lo tih sawiin Vanlalzuata chuan, "A sawi leh tur pawh dâwt bawk, an ti a. Pathian thu duh em em, khawi hmunah pawh sawi nasa hnam, mahse, tu thusawi mah awih lo hnam nih hi a pawi," a ti a; mi rinawm chu mi dangin an thlamuanpui ṭhin tih a sawi.