MZU-in loneitute tan workshop buatsaih

Mizoram University (MZU)-a Department of Forestry chuan nimin khan MZU conference hall-ah 'Sustainable farming techniques in Mizoram' tih thupui hmangin loneitute pualin national workshop an buatsaih.

Prof. SK Tripathi-in a kaihruai a, MZU vice chancellor Prof. KRS Sambasiva Rao chu khuallian niin, microbiologist hmingthang Prof. BA Chopade chu khualzahawm a ni a; soil scientist leh IARI, New Delhi principal scientist Prof. ON Tiwari pawhin a hmanpui.

Zirhona hi sorkar laipui hnuaia DST-SEED (TSP) bultuma buatsaih a ni a; a tum ber chu - Mizorama loneitute'n hlâwk zawka thlai an thar theihna tura hmalak a ni. Mizoram sorkara a kaihhnawih department aiawh te, sangha khawi, pa khawi, changpât hmanga leiṭha sâwngbàwl (vermicomposting) leh khuai khawi lama mithiamte'n thil pawimawhte an zirtir a ni.

Aizawla KVK farm manager Lalvensanga Pachuau-in changpât aṭanga leiṭha siam dan leh a pawimawhna te, pa khâwi dan leh hlâwk zawka thar dante a zirtir a; pa chi thar/ṭha lakna leh leina chu an harsatna lian ber a nih thu a sawi.