Covid-19 hian eng emaw chenah Sorkar a chhanhim zawkin a lang - MBJP President

Mizoram BJP president Vanlalhmuaka chuan sum leh paiah Mizoram sorkar chu Covid-19 in eng emaw chenah a chhanhim zawk nia a lan thu a sawi.

Tunhnaia Lawngtlai an tlawhnaah MBJP President chuan, MNF sorkarin thuneihna an chan hnuah sum lamah harsatna nasa tak an tawk nia sawiin, "Covid-19 khan eng emaw chenah sorkar hi a chhanhim zawk niin a lang. Hripui avang khan central aṭangin sum tam tak an dawn phah a, hei hi Central BJP-in mipuite'n harsatna an tawh a duh loh vang zawk a ni," a ti.

MBJP President chuan MNF sorkar chuan sorkar hnathawk hlawh a hun takah an pe thei tawh lo tih sawiin, "Ba lah a ngah em em a, sum leh pai enkawl kawngah a fail chiang hle a ni. Mipuite hnenah cheng nuai 3 intiam kha

Rs 50,000-ah tla thlain, tunah phei chuan Rs 25,000-ah a tla thla leh tawh thung a ni," a ti a, Mizoramin sorkar a hrawn mek chu sorkar zui zel tlak a ni tawh lo tih a chian thu a sawi.

Vanlalhmuaka chuan, MNF hotute'n central sorkar an dawr dawnin NDA-ah BJP-te nen thawkdun an nih thu hahipin an sawi nia sawiin, "Mizoramah erawh BJP chu thawhpui chi an nih loh thu an sawi leh mai ṭhin. An nihna dik tak chu lehlama awr dum, lehlama awr sen an ni," a ti.

BJP chu India ramah Hindu lalram din tum, Kristiante tiduhdahtu tia sawi ṭhin a nih thu sawiin MBJP President chuan, "Hei hi thu dik tak hriat loh vang leh party ṭhenkhatin BJP lian zel tur an hlauh vanga dik lo taka propaganda an vawrh mai mai a ni," a ti a, India rama Kristian tihduhdahna thleng ṭhin chu uluk zawka zirchian chuan Congress sorkarna state-a thil thleng ṭhin zawk niin a sawi bawk.