KHAWTHLIR

Farkawn Re-Union, Aizawl chuan nimin khan Covid-19 hri lêng dona atan Ṭiau lui kama duty Farkawn task force-te hnenah Rs. 1,04,610 leh ni tin mamawh Rs. 60,000 chuang hû an hlân. Farkawn khaw ṭhenawma khaw pahnih Thektê leh Thekpui khaw task force-te hnenah Rs. 10,000 ve ve leh Khankawn task force hnenah Rs. 3,000 

an pe bawk

Ṭhalai Kristian Pawl, Lawngtlai College Veng Unit chuan nimin khan Lawngtlai District Hospital-ah thisen unit 19 an pe a, a petute mipa 13 leh hmei­chhia paruk an ni. Vairengte, Bilkhawthlir leh Bilkhawthlir Vengthara Adventist Youth Ministry-te pawhin nimin khan Kolasib District Hospital-ah thisen unit 9 an pe a, vawiinah an pek chhunzawm ang.

Aizawl district magistrate chuan, inkhàrkhip chhunga lirthei tlân chhuak thei zingah, mimal lirthei (four wheeler)-ah ṭhutna awm zat aṭanga a zatve aia tam chuan phal a nih loh thu leh, AMC huam chhunga mimal two wheeler-te chu tlân chhuak thei zingah an tel loh thu a tarlang. Thupek hian Covid-19 duty tura sorkarin a ruatte lirthei a huam lo.

SDMA hnuaia State Executive Committee chairman Lalnunmawia chuan inkhàrkhip chhunga intlàn chhâwkin a huam loh tur zingah, duty-na atana hman kohhran hminga lirthei register-te telh a nih thu a puang.

Champhaia Excise & Narcotics department chuan Champhai Zotlang task force-te nen ṭangkawpin nimin khan Lalremthanga (23) s/o Lalhriatkimi, Zokhawthar nia insawi hnen aṭangin heroin gram 78.32 an man a, thubuai an siamsak. Lalremthanga chuan heroin chu inkharkhip hma-a Myanmar aṭanga a lakluh niin a sawi.

Kolasib DC Dr H Lal-thlangliana hoin nimin khan DC conference hall-ah district level task force an ṭhu a, inkhâr-khip laia inkaihhruainate an sawiho. Bawrhsap chuan, Kolasib district hhung ramri hrûla hmun 61-ah ṭhalai an duty mek thu leh an district pal-tlanga state páwn aṭanga lutte uluk taka enfiah vek an nih thu a sawi.

National Trade Union of Mizoram (NTUM) PHE department chuan thuchhuah siamin, PHE department-a muster roll-a thawkte'n Covid-19 vanga nun­phung a buai laia mipui mamawhna phuhru tura hna an thawk thei chu an lawm thu an tarlang.

NTUM chuan, "Tui buaipuitute hian engtik lai pawha min thlâwp a, min fuih phûr reng turin mipui kan sáwm a ni," an ti. Aizawl district-a PHE department-a MR-te chuan sum an thawh khawm Rs. 1,00,700 chu Covid-19 donaa hman atan Chief Minister Relief Fund-ah an thawh a ni.

Mizoram sorkar thuchhuah chuan, Covid-19 léng vanga Mizoram sorkarin mi harsa, inhlawh chawpte ṭanpuina atana Supply retailer-te kaltlanga a thlàwna buhfai sem chhuahna senso zawng zawng chu rulh lêt a ni tih a tarlang.

Rulh lêtna atan hian LESDE department hnuaia MBOCWWB aṭanga FCSCA department-in sum a hmuh chu DCSO zawng zawng hnenah nimin khan pek chhuah a ni a; FCSCA chuan retailer zawng zawngte chu anmahni bialtu DCSO ṭheuh hnenah an bill ngaihven turin a hriattir a ni.

AH&Vety secretary C Lalpeksanga hoa nimina Task Group on Animal Husbandry & Veterinary Service and Fisheries 

ṭhukhawm chuan, Mizoramin a thar chhuah hmanga ran chaw man tláwm zawk siam chhuah dan tur an sawiho. Pángbâl leh káwlbahráte ran chaw atana hman ṭangkai dan tur mithiamte'n rua­hman se, an ti a; a hlawh­tlin chuan ran chaw man 20% vela a tlakhniam an beisei a ni.

Lawngtlai district bawrhsap Shashanka Ala chuan thupek chhuahin, Covid-19 laka himna tura inkhàrkhip thawh thumna kalpui turah Mizoram sorkarin inkaihhruaina a siam hrang hrangte zâwm ṭheuh turin Lawngtlai district mipui a hriattir.

Champhaia UDPA department chuan nimin khan DAY-NULM kal­tlangin Champhaia home hrang hrang pasarihah Covid-19 laka invênna tur hmanrua - hmai tuamna, kut silfaina sahbawn leh hmunhma tihthiang­hlimna (disinfectant) ṭha-hnem tak an pe. Hmanrua an pe home-te chu - Rose Children Home, TNT Mazuia Memorial Home, Emmanuel After Care, Genesaret Childrens' Home, Bethany Old Age Home, Grace Receivers Home leh Metakhen Re­formation Center-te a ni.

Champhai Ṭhalai Pawl (CṬP) chuan an district mi leh sa, inkhârkhip vanga state danga tangkhang harsatna tawk mi 20-te chu Rs. 1,000 ṭheuh an pe a, an bank account-ah an thunsak. CṬP hi an district-a ramri venga duty-te ṭanpuina pein ṭum li an feh chhuak tawh a, buhfai, chini, chi, thingpuife leh thosi hlo leh pawisa an pe a ni. Ṭanpuina an sem theihna tura mi inphalte - Champhai District Import Export & Transport Union (CIETU), Mosia Agencies, Champhai NGO Coordination Committee leh mimalte hnenah lawmthu an sawi.