PC emeritus president-ah Lalhmangaiha Sailo ruat

PC party acting president Vanlalruata chuan party president nihna chawlhsantu Lalhmangaiha Sailo chu emeritus president-ah ruat a nih thu a puang.

Vanlalruata chuan, Finance minister, chief minister ni bawk Zoramthanga chu sum leh pai enkawlah a hlawhchham lailet der nia sawiin, "Budget siam laia sum hmuh tura beisei aia tam kan sorkarin a hmu deuh ziah chungin sum hmannaah a hlawhchham avangin kan leibá a pung zual zel. Tunah phei chuan leibá kan neih theih zat bituk aia tam kan ba tawh a ni,” a ti.

MNF sorkar hma kumah revenue surplus cheng vbc. 1,699 a awm thei tih sawiin Vanlalruata chuan, "MNF an sorkar ṭan kumah cheng vbc 1,533-ah a tlahniam nghal. Mahnia finance an enkawl ṭan kumah cheng vbc. 204-ah a tla thla nghal a, a hnu kum aṭang chuan a deficit char char tawh," a ti.

Covid vanga sum hmuh tlahniam angin an sawi ṭhin tih sawiin, "A takah chuan kum 2020-21 ah kan hmuh tum kan hmu pha lo tih lohah chuan kum tin kan hmuh tum aia tam kan hmu ziah a ni. Keini chuan hemi siamṭhat dan tur hi kan hria a ni," a ti bawk.