PM-KISAN chungchang sawiho

Lawngtlai district Grievances Redressal and Monitoring Committee under PM-KISAN chu an chairman Amol Srivastava, bawrhsap hoin nimin khan DC conference hall-ah an ṭhu a, hmalak dan tur an sawiho.

Ṭhutkhawmah hian Pradhan Mantri Kisan Samman Nidhi (PM-KISAN)-a inziak lut thei lo zinga mi - sorkar hnathawk leh pensioner-te zinga inziak lutte leh chhungkaw pakhat aṭanga mi pakhat aia tam inziak lutte paih dan tur an ngaihtuah a ni.

Scheme-a inziak lut, anmahni la finfiah lohte finfiah dan tur te, hamṭhatna dawng thei tur kut hnathawktute September 2022 ral hmaa PM-KISAN portal-a an inziah luh kim theih dan turte an rél bawk.

PM-KISAN hi kum 2019-ah kalpui ṭan a ni a, sorkar laipuiin kut hnathawktute ṭanpuina tura a ruahman a ni. Kut hnathawktu, ram neite an inziak lut thei a, kum tin bank kaltlangin ṭanpuina Rs 6,000 an dawng ṭhin a ni.