Covid-19 vei enkawl lai an tlem tial tial

September 11, Pathianni khan Mizoramah Covid-19 vei mi pakua hmuh chhuah a ni a, nimin khan hripui vei dam tawh mi 68 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 230 awmin, an tlem tial tial.

Pathiannia hripui vei hmuh thar mi pakuate chu mipa panga leh hmeichhia pali niin, RAT hmanga hmuh chhuah vek an ni a, swab sample 105 endik aṭanga positive zat chu 8.57% chiah a ni.

Nimin khan hripui vei dam tawh mi 68 an chhuak a; district tina chhuak zat chu - Mamitah mi 16, Aizawlah 15, Lungleiah 14, Saitualah pakua, Serchhipah paruk, Siaha, Champhai leh Lawngtlaiah pahnih ṭheuh leh, Kolasib leh Hnahthialah pakhat ve ve a ni.

IDSP record angin, Mizoramah Covid-19 vei 2,37,755 hmuh chhuah a ni tawh a, mipa 1,10,735 leh hmeichhia 1,27,020 an ni a, mipa aiin hmeichhia 16,285-in an tam zawk. Nimin tlai dar 5 thleng khan mi 2,36,803 (99.60%) chhuahtir an ni tawh a, mi 722 (0.30%) thi tawhin, enkawl mek mi 230 (0.10%) an awm.

Kum 2011 chhiarpui angin, Covid-19 vei hmuh tawh 2,37,755 chu state mipui zat aṭangin 21.67% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.