KHAWTHLIR

PUC-in thisen pe
Pachhunga University College NSS chuan nimin khan an college hall-ah thisen pek an huaihawt a, mipa 117 leh hmeichhia 27-te'n Civil Hospital, Aizawl tan thisen unit 141 an pe. Thisen petute hi Arts zirlai 5th semester leh BBA zirlaite an ni.

Ruihhlo tichhia
Mara Thyutlia Py (MTP), Siahatláh Branch chuan September 11, Pathianni zan khan kumin July thla chhunga ruihhlo leh ruihhlo siamna hmanrua an mante chu MTP General Headquarters-a Games & Sport secretary Reuben Hlychho hoin an tichhia. MTP, Siahatláh Branch hian July 2022 chhung khan sapzu ûm 114, beer bûr 57, rakzu (sahma) litre 484, east/khamir pocket panga, bél kháp 10-a lian 40 leh kháp ruka lian 42, heroin eng emaw zat, thing leh pipe eng emaw zat an man a; an thil man zawng zawng hlut zawng chu Rs 4,72,800 a ni.

Bawlhhlawh sawiho
Lawngtlai DC Amol Srivastava hoin nimin khan DC conference hall-ah Lawngtlai khawpuia bawlhhlawh sâwngbâwl leh thliar hran (solid waste management) chungchang LADC-a LAD changtu executive member C Rongura, state sorkar leh LADC hnuaia a kaihhnawih department-te'n an sawiho. Felfai leh kawngkal nei zawka bawlhhlawh sâwngbâwl leh thliar hran a nih theih nana hmalakna turte an ngaihtuah a ni.

Kolasib Town Planning
Kolasib Town Planning and Development Committee chu an chairman K Lalrinliana, minister of state kaihhruaiin nimin khan DC conference hall-ah an ṭhukhawm. Minister hian Kolasib khawpui chhung ah hmasawnna awmze nei leh ruahmanna felfai a awm theih nan ngaihtuahna seng a, tihlawhtling tura thawk turin kalkhawmte a sawm. Meeting-ah Kolasib Town Planning area (boundary) tura ruahman tawh chu a hma aia huam zau zawk turin an rêl. Veng tina lirthei dahna tur bik ruahman dan tur leh thlànmual inṭâwm felfai taka siam dan turte sawiho a ni bawk.