MBBS leh BDS seat Hnawhkhah vek a ni

Mizoramin Central pool hnuaia MBBS leh BDS-a quota a neihte chu nimin khan hnawhkhah kim a ni. Hetih lai hian, engineering line-ah Mizoramin quota a neih zingah 45 chu hnawhkhah a ni lo.

MBBS leh BDS atan hian August 25, 2017 khan counselling neih a ni tawh a, mahse, BDS seat pathum chu thlang an awm loh avangin nimin khan counselling neih leh a ni. August 25 khan counselling atan zirlai 100 koh zinga mi 30 an inlan a, MBBS-a Mizoramin seat a neih zawng zawng, 17 chu pek chhuah vek a ni. BDS-a Mizo­ramin seat pakua a neih zinga paruk chu an thlang an awm a, a bak pathum chu thlang an awm lo.

BDS seat thlan zawh a nih loh avang hian nimin khan counselling koh leh a ni a, BDS seat pathum hnawhkhahna atana tih ni mahse, BDS thlang tawh mi paliin an duh leh loh avangin seat pasarih atan counselling hi neih a ni. Nimina counselling-a kalte chuan BDS seat ruak pasarih an thlang vek a ni.

NEC hnuaia Mizoram MBBS leh BDS-a seat a neihte chu hnawhkhah a lo ni tawh a, Central pool hnuaia seat neihnate hi hriat lâwk a nih loh avangin counselling neih hun a tlai phah a ni.

Nimina councelling neih zawh taka BDS seat pasarih hnawhkhah a nih tâk avang hian Mizoramin biology group-a seat a neih zawng zawngte chu hnawhkhah vek a ni ta a; engineer group lama Mizoramin seat a neih zingah 45 zirlaite'n an thlan duh loh avangin hnawhkhah a ni lo thung.