MZUSC-in Sept. 5 hmain MZU-ah Vice chancellor nghet dah an phût

Mizoram University Students Council (MZUSC) chuan, nimin khan Union minister for Human Resource Development (HRD) Prakash Javadekar hnenah MZU-in vice chancellor nghet an neih loh chungchang leh a rang thei ang bera vice chancellor nghet pe tura ngenna an thlen a; September 5, 2017 hmaa dah a nih loh chuan zirna an chhunzawm loh tur thu an puang.

MZUSC chuan, MZU-in kum hnih dawn lai vice chancellor nghet a nei lo tawh tih sawiin, chu chuan MZU-ah harsatna tam tak a thlen thu an tarlang a, "Vice chancellor nghet dah thuai tura ngenna kan siam chung pawha tun thlenga ngaih pawimawh an hlawh lo hi MZU zirlaite min hmuhsitnaah kan ngai a ni," an ti.

MZUSC chuan, September 5, 2017 hmaa vice chancellor nghet dah a nih loh chuan vice chancellor nghet dah tura an ngenna tihhlawhtlin a nih theih nan MZU zirlaite'n MZU chu dan pangngaia a kal an remti dawn lo tih an sawi a, "Zirna kan chhunzawm tawh dawn lo a, hnathawk zawng zawng pawh an pisa kai tur kan dang dawn a ni," an ti. An ngenna tihhlawhtlin a nih theih nan na zawka hmalak zel an tum thu an sawi.

MZUSC hian HRD Minister hnena an lehkha thehluh hi a copy India President leh MZU Visitor Ramnath Govind, Mizoram Governor, Mizoram Chief Minister, Mizoram MP-te leh a kaihhnawih officer hrang hrang an pe bawk.