Hawla ṭawngkam kohhranin ngaiah an nei tawh - Zorama

MNF president Zo­ramthanga chuan, koh­hran khei zawnga chief minister Lal Than­hawla a ṭawng pawhin kohhran­in ngaiah an nei tawh niin a sawi a, "Kohhran pawhin 'Lo sawi ve mai mai teh se' an ti tawh niin a lang," a ti.

Nimina Mizo Hnam Rûna inkhawmah Zoramthanga chuan thu sawiin, "Congress sorkar sawiselna leh duhkhawp lohna mipuiin an sawi luai luai a, heng hi MNF-in kan tihtir emaw, kan sawitir emaw a ni lo. Zu zuar turin kan ti lo a, kawngpui kan tihchhiattir a ni lo a, harsatna tam tak thleng mekte hi kan tih a ni lo," a ti a; Congress tih vek zawk a nih thu a sawi.

MNF leh India sorkar­in inremna zawnga hma an lak lai velin VISA leh passport chungchangahte harsatna an tâwk fo tih sawiin Zorama chuan, "Pathian leh mipui zârah sorkarna kan chang a nih chuan Mizo kan nih vang leh kan hmel a danglam deuh vanga India rama harsatna kan tawk fo hi tihbo kan tum dawn a, India ramah Mizoram mi kan ni tih hi chhuan tham a nih theih nan hma kan la dawn a ni," a ti.