Âwm ná leh kawṭhalo tihtlem dan tur sawiho

Lawngtlai District Committee on Integrated Action Plan for Pneumonia and Diarrhoea (IAPPD) chu an chairman Dr A Muthamma, Lawngtlai DC hoin nimin khan an ṭhukhawm a; an district-a áwm ná leh kaw-ṭhalo vanga naupang thihna a tlem theih dan tur an sawiho.

Dr A Muthamma chuan, Mizorama district pariat zing­a a hnufual ber leh hnufûm ber ni reng lo tura ṭan lak a pawimawh thu sawiin, member-te chu ngun taka an ngaihtuahna séng turin a sáwm a, "District hriselna atana hna thawh hi mi tin mawhphurhna a ni," a ti.

Âwm ná leh kawṭhalo hi khawsakna hmun ṭawp lutuk te, tui thianghlim hman tur neih loh vang leh zun leh ek thiarna mumal awm loh vang­tea thleng ṭhin a nih avangin, anganwadi centre, sikul leh damdawi-ina inthiarna hmun ṭha tak buatsaih a pawimawh thu meeting-ah hian tarlan a ni.

Khawvela naupang thihna zinga 29% chu áwm ná leh kawṭhalo vanga thleng a ni a, hei vang hian kum tin naupang nuai 20 vel an thi ziah anga chhût a ni. Heng natna chi hnih vanga naupang thihna thleng ṭhin tihhniam a nih theih nan kum 2013 khan UNICEF leh WHO hnuaiah Global Action Plan for Pneumonia and Diarrhoea (GAPPD) an din.

GAPPD hi India pawhin a zawm ve nghal a, IAPPD duan zui a ni. Hemi kawnga hmalak dan tur chipchiar leh fel zawka duang turin August 31 leh September 1, 2017 khian State Guest House-ah state level consultative workshop on IAPPD & India Newborn Action Plan (INAP) buatsaih tum a ni.