MPC-in MLA fund hmang tlem bikah Congress MLA 23 an puh

MPC party office bearer-te nimin­a an pisaa an senior vice president Vanlalhlana kaihhruainaa ṭhukhawm chuan thuchhuah an siam a; opposition MLA-te'n MLA fund an bial tan an hman zawh deuh vek tawh laiin, Congress MLA 23-te'n an la hmang zo ve lo niin an tarlang a, an bial chhung an ngaihthah vanga an ngaih thu an sawi.

MLA tinin an bial ṭheuh tihhmasawn nan kum khatah fund cheng nuai 100 ṭheuh an nei tih sawiin MPC chuan, "Opposition MLA zawng zawng leh Congress MLA ṭhenkhatte'n an bial tihhmasawnna atana an hman zawh vek tawh laia Congress MLA 23-te'n an la hmang zo ve lo hian an bial chhung an ngaihthahzia leh hmasawnna an ngaih pawimawh lohzia a tilang chiang hleah kan ngai," an ti.

Congress MLA 23-in MLA fund an la pe chhuak tlem chu an bial chhung hmasawnna hna thawhna atana hmang lo a, inthlan dawna vote lei nan an khêka an ngaih thu an sawi a ni.

MPC party chuan, "Congress leh MNF-te'n kum 30 zet Mizoram an sawp chhiat vanga kan ram retheihna leh pachhiatna khura tlu mek siamṭhaa tungding leh tura MPC, ZNP, ZEM-te'n thawhhona thuthlung an siam hi ṭha kan ti," an ti a; thawhhonain hmalakna tur a siam leh a ruahman apiangte hlawhtling taka hlen chhuah a nih theih nan thawhhona chu rinawm taka an vawn an tum thu an sawi bawk.