Tuitla zawng mek

August 26, Inrinni chawhnu dar 2 vel khan Lalhmunsangi (36) d/o Lalchungnungi, Khawzawl Zuchhip Veng chu Mangpui rama a riak haw lam Tuichâng lui kânna leiah chesualin tuiah tla nia hriat a ni a, Pathianni aṭang khan Khawzawl khaw­tlangin an zawng a, an khaw ṭhenawm ṭhenkhatte'n an zawnpui bawk. Tuiin ruang a len dan nan hmun eng emaw zatah ngar an hém a ni.

Lalhmunsangi ruang hi he thu ziah lai thleng hian hmuh a la ni lo a; a zawngtute mamawh phuhrûkna atan bialt­u MLA Lalrinliana Sailo-in Rs. 5,000, Khawzawl PWD EE Zosangliana'n Rs. 2,000 leh Khawzawl BDO Lalremruata Sailo-in Rs. 3,000 leh silpauline paruk an pe. Lalhmunsangi chesual lai hmu an awm lo a, a bungruate Tuichang lui kam, Rabung kawng lamah hmuh a nih bakah, August 27 chhun khan a kawr ni ngeia hriat chu lei aṭanga km. khat velah hmuh a ni.