KHAWTHLIR

Blood workshop
National Health Mission, National Institute of Biologicals, Mizoram State Blood Cell leh Association for Voluntary Blood Donation-te chuan vawiin hian Assembly Annexe conference hall-ah ni hnih awh tur, 'Workshop on strengthening of blood services & haemovigilance' an buatsaih dawn a; Health minister Lal Thanzara'n a hawng ang. Zirhonaah hian state hrang hrang aṭangin an tel dawn a, zing dar 9:30-ah ṭan a ni ang.

Bûklung endik
Champhai SP ngenna angin Legal Metrology leh Police ṭangkawp chuan, tun hnai khan Champhai khawpuia sa sêrtute bûklung hman an endik a, mi 15 vel bûklung hman a dik lo tih an hmuchhuak. Bûklung dik lo hmangtute hi nimin khan Legal Metrology office-ah koh an ni a, man chawiin an bûklung siamṭhatsak an ni.

Eng awm dawn lo
Power & Electricity department chuan, rokhawlhna dang a awm loh chuan August 28-30, 2017 chhungin NH-44A laih turah thing kih a ngaih avangin, hna an thawh chhungin kawlphetha pek ngam a ni dawn lo tih a tarlang a, "Zing dar 9:30 aṭanga tlai dar 5 thleng Mamit Sub-Station-in a châwm te'n power supply an nei thei dawn lo," an ti. P&E department hian mipui hriatthiamna an ngen a ni.

MLA-in pe
Kolasib bialtu MLA PC Zoram Sangliana chuan, a hmalaknaa Medica Superspeciality Hospital, Kolkata-in an pek patient monitor pahnih, chu Kolasib District Hospital hnenah a pe a; Bairabi PHC tan water cooler pakhat a pe bawk.