ZPM MLA-te'n quarantine centre an tlawh

ZPM Legislature Party (ZLP) member panga - Lalduhoma, Vanlalhlana, Andrew H Thang­liana, VL Zaithanzama leh Lalchhuanthanga te chuan Covid-19 quarantine centre pahnih - R Dengṭhuama Hall leh Tourist Centre, Berawtlangte nimin khan an tlawh a; khung hran mekte dinhmun an enfiah.

ZPM party tarlan danin, R Dengṭhuama Hall-ah chuan April 1, 2020 aṭangin Mizoram páwn aṭanga hawte dah luh ṭan a ni a, mi 134 an awm mek. Centre-a an luh dawnah medical team-in Rapid Anti Body Test an tih vek avangin Covid-19 an kai lo veka ngaih a ni. Khung hrante chu an chhungte'n bungrua an pe ṭhin tih sawiin MLA-te chuan, chu'ngte chu endiktu an awm loh avangin ruihhlo inpe tâwkte pawh an awm theih avangin a fel lo hlea an ngaih thu an sawi.

R Dengṭhuama Hall leh a chhehvelah bawlhhlawh leh sarâng ruak hmuh tur a tam hle tih tarlangin ZPM thuchhuah chuan, "Thianghlim leh felfai zawka enkawl ni thei se ZPM MLA-te chuan an duh hle a ni," a ti.

Berawtlanga Tourist Centre-ah pawh April 1 aṭangin mi khung hran ṭan a ni a, tun din­hmunah mi 70 an awm mek. An ni pawh medical team-in Rapid Anti Body Test an tihsak vek a, Covid-19 vei an awm lo. Ni sarih hnuah endik leh tur an nih thu, MLA-te lo dawngsawngtu doctor chuan a sawi.

Tourist Centre-ah hian khung hran mekte chu an chhungte'n an tlawh theih hun ni tin tlai dar 3-5 chhung hawn ṭhin a ni a, an chhungte'n bungrua an kensakte chu force duty-te'n an lo endik zel thung. Doctor-te'n khung hrante chu an taksa an sawizawi dan tur te, rilru lam kaihhruaina lehkhabu chhiar turte an ngaihtuahsak ṭhin a ni.

ZPM MLA-te chuan, qua­rantine centre hrang hrangah psychiatrist emaw, psychologist emaw duty tur sorkarin dah thei se an duh thu an sawi.