Sorkar pawisa dinhmun azirin Expenditure sanction a awm hunah SEDP 2nd installment pek tum a ni
Planning & Programme Implementation department chuan SEDP hnuaia mi 60,000 hnena Rs 50,000 pek turte chu expenditure sanction a awm leh hunah 2nd installment pek an nih dawn thu Vanglaini-in RTI Act hmanga a zawhna chhangin an tarlang. SEDP hi ṭum hniha sem tur a ni a, Rs 25,000 ve vea sem tur a ni.
Chhungkaw 60,000 hnena Rs 25,000 sem tur bak, 2nd installment tur Rs 25,000 ruahman fel a nih tawh leh tawh loh zawhna chhangin Planning department chuan, "Sorkar pawisa dinhmun a zirin 2nd installment hi December 1, 2022 aṭanga February 15, 2023 chhunga sem zawh tura ruahman a ni. Expenditure sanction a awm leh hunah implementing department ngai thote hnenah a dawng turte hnena ṭanpuina sem turin hlan leh a ni ang," an ti.
Planning department chuan, SEDP 1st phase-a chhungkaw 60,000 hnena sem bak, chhungkaw dang hnena sem leh tum a nih hun zawhna chhangin, "Tun financial year chhungah chhungkaw 60,000 hnena sem phawt tur a ni," an ti a, chhungkaw dang hnena sem leh tura ruahmanna siam a nih tur thu an tarlang.
Planning department tarlan danin, SEDP 1st installment Rs 25,000 chu September 1, 2022 aṭanga October, 2022 chhunga sem zawh tura ruahman a ni. SEDP hi state budget pangngai aṭanga sem a ni.
SEDP hnuaia sum fai sem tur (family oriented) hi August 19, 2022 khan Vanapa Hall-ah chief minister Zoramthanga'n a hawng a ni. Chief Minister chuan, Rs 3,00,000 emaw, a aia tam emaw sem chu an target a la nih reng thu a sawi.
CM Zoramthanga chuan, Covid-19 avangin a tìra an ruahman angin SEDP chu kalpui theih a nih loh thu a sawi a, "Finance leh Planning-te nen kan inráwn a, tlin chin chinin ti ang kan ti a, cheng vbc. 300 kan dah ta a ni. A tira kan duan ang leh tum ang sum dinhmunin a phâk loh avangin kan ti thei lo. A tirah Rs 3,00,000 emaw, a aia tam emaw tiin programme kan siam a, hei hi kan target a la ni reng," a ti.
SEDP chu Rs 50,000 sem a nih dawn chuan chhungkaw 60,000-te'n an dawng kim nghal thei dawn lo tih sawiin CM Zorama chuan, "Chutianga kan tih chuan vuivaina a nasa dawn lutuk. Chhungkaw 60,000 hnenah hian Rs 25,000 ṭheuhin sem phawt a ni dawn," a ti a, 2nd installment pawh a hma thei ang bera tih an tum thu a sawi.