Union MoS a rawn zin

Union minister of state for Rural Development, Consumer Affairs, Food & Public Distribution Sadhvi Niranjan Jyoti chu nimin khan ni thum cham turin Mizoramah a rawn zin. Nimin vêk khan Vaivakawn chawhmeh bazar tlawhin, bazara chawhmeh zuartute a kawm.

Union minister of state Sadhvi hi Lengpui Airport-ah Rural Development minister Lalruatkima leh sorkar hotute'n an lo hmuak a, New Delhi-a zin tur chief minister Zoramthanga nen Lengpuiah an inkawm nghal.

Vaivakawn bazar a tlawhnaah hian Sadhvi Niranjan Jyoti chuan, Vaivakawn bazar chan­chin a lo hriat tawh thu leh nuho hlirin dawr an nghak tih a hriatin a tlawh chak thu a sawi a, "Thingtlanga pianga seilian, thingtlang nu ve mai ka ni a, VIP angah pawh ka inngai lo. In zingah hian ka mikhual lo a ni. Prime minister Narendra Modi-a'n India hmarchhak a ngai pawimawh a, a thuchhuak anga rawn kal ka ni," a ti a, consumer-te'n harsatna an tawh angte a hnena an thlen chuan sutkiansak dan kawng a zawnpui tur thu a sawi.

Vaivakawn bazar en­kawltute chuan Vaivakawn bazar building sak ṭhatsak tura an ngenna chu urban area a awm a nih avangin project proposal-te siam turin a chah a, theihtawp chhuaha a lo bawhzuisak tur thu a hrilh.

Union MoS hi nizan khan Raj Bhavan-ah Governor Dr Hari Babu Kambhampati nen an in kawm a; vawiinah Mizorama Aspirational District awm chhun Mamit district a tlawh ang.