MJA member-te'n Defence Study Tour nei
Ministry of Defence chuan September 13-20 chhungin Mizoram Journalists' Association (MJA) member-te tan Defence Study Tour an buatsaih a, nimin khan tour-a tel tur mi 11 te chuan Guwahati an thleng. Tour-a tel turte hi Aizawl Press Club kawt aṭangin MJA president C Lalrambuatsaiha'n a vailiam.
MJA President chuan Defence Study Tour buatsaihsaktu Ministry of Defence leh hma laksaktu Rajya Sabha MP K Vanlalvena te chungah an lawm thu sawiin, tour-a telte chu Mizoram leh Mizo journalist-te hming ṭhatna tur zawnga mawi taka khawsa tur leh an thil hmuh leh hriat tharte hlâwkpui ngei tum turin a chah.
Tour-ah hian MJA member-te chu India defence system hrang hrang zirtir an ni dawn a, Assam leh Arunachal Pradesh state chhunga sipai (Army leh Indian Air Force) hmunhmate tlawhpui an ni ang a, ralthuamte entira hrilhfiah an ni bawk ang. Ruahman dan chuan, September 21, 2022-ah Mizoramah rawn haw leh tura beisei an ni.
Defence Tour neih a nih theih nan hian Rajya Sabha MP K Vanlalvena chuan hma a la a, a hmalakna avang hian tour hi neih theih a ni. Rajya Sabha MP chungah hian MJA chuan lawmthu an sawi. Rajya Sabha MP hian kalna senso tur pawh tumin, kalna senso phuhrûkna turin Minister Dr R Lalthangliana'n sum a pe bawk a ni.