State sorkarin a pek chhuah loh vangin Councillor-te'n fund an la dawng thei lo
Aizawl Municipal Corporation (AMC) councillor-te chuan Mizoram sorkarin an sum tur a la pek chhuah loh avangin nimin tlai thleng khan kum 2022-2023 atan ward development fund an la dawng lo.
Vanglaini thudawn danin, sorkar laipui chuan AMC sum tur hi a pek chhuahna a rei tawh a, mahse state sorkar chuan AMC hnenah a la hlân chhâwng lo a ni. Dan ang chuan AMC sum tur hi sorkar laipuiin a release aṭangin infrastructure ṭhatna hmunah chuan ni 5 chhunga release tur a ni a, infrastructure ṭhat lohna hmunah chuan ni 10 chhunga release tur a ni thung.
Huntiam chhunga release a nih loh chuan Mizoram sorkar hian penal interest nen AMC hnenah hian a pek a ngai dawn. Tun dinhmunah Mizoram sorkarin penal interest a pek tur hi cheng nuai 20 vel a tling tawh.
Kum 2022-2023 atan hian AMC councillor ward development fund atana ruahman chu cheng nuai 570 a ni a, councillor 19 te chuan fund cheng nuai 30 ṭheuh an nei tihna a ni. Cheng nuai 30-ah hian cheng nuai 10 chu property tax return aṭanga pek tur a ni thung.
AMC councillor ward development fund hi ṭum hnih - sorkar kumthar tìr lam leh sorkar kum tawp dawn lam deuhah pek chhuah a ni tlangpui ṭhin. Kum 2022-2023 ah erawh thla ruk vel hnuah pawh councillor-te'n 1st installment pawh an la dawng lo a ni.