Board of Trade meeting-ah Dr Thangtea
Nimin khan Union Commerce and Industry minister Piyush Goyal hoin Delhi-ah Board of Trade meeting neih a ni a, Mizoram Commerce & Industries minister Dr R Lalthangliana pawh a tel.
Dr R Lalthangliana chuan Mizoramin a thar leh a hralhchhuah theihte bakah Mizoramin India ram thil hralhchhuah hlawknaa a thawh ve theih tur chi hrang hrangte sawiin, "Mizoram chuan Bangladesh leh Myanmar a ri avangin leh heng ram pahnih ri depa chengte nen thui tak thlahtu chhui dun thei kan nih avangin insumdawn tawnna kawngah pawh inrintawnna leh inhriat chian tawnna kan nei sa a ni," a ti.
Mizoram sik leh sa chu thlai leh theirah thar kawngah hma eng tak a awm tih sawiin Dr R Lalthangliana chuan,"A bik takin agriculture, horticulture leh food processing lamah nasa takin hma kan sawnin, kan ṭhang thei a ni," a ti a, sapthei, serthlum, hatkora, balhla, dragon fruit; thlai - sawhthing, aieng, hmarcha, anthurium, rose etc., ten Mizoram leilung an ngeih thu a sawi.
Dr R Lalthangliana chuan thlai, thei leh pangpar chi hrang hrangte chu tun aia nasa lehzuala chin a nih chuan Mizoramin a hlawkpui tur thu sawiin, "Thlai leh theirahte thar chhuah a nih hnua sawngbawl zui (post-harvest management)-na tur hmanrua leh bungraw ṭha Mizoramin a neih ṭhat tawk loh avangin sorkar laipuiin min rawn ngaih pawimawh sak a ṭul a ni," a ti.
Dr R Lalthangliana chuan handloom, textiles leh handicrafts chu agriculture industry dawtah Mizoram mipui hmalakna lian ber a nih thu sawiin, "Mizo kutchhuakte chu tunhma aṭang tawhin India ram leh ram pawn mite'n an hlut tawh ṭhin," a ti a, nasa lehzuala sorkar laipuiin hma a lakpuia ruahmanna a siampui phawt chuan ṭhalaite tan eizawnna ngelnghet tam tak siam a nih tur thu a sawi.
Mizoram chu mau chi hrang hrangin an ngeih thu tarlangin Dr Thangtea chuan, "Mau hmanga thil siam chi hrang hrang inchhung bungrua aṭanga thil dangte khawvel pumin a hlut avangin Mizoramah tunlai thiamna sang ber hmanga mumal leh changtlung zawka mau sawngbawl a hlawk hle dawn. Hemi atan hian ruahmanna felfai tak neih a ṭul," a ti.
Indo – Myanmar border ah Hnahlan, Zote, Vaphai leh Pang khuaahte border haat siam tura hmalak mek a nih thu leh Bangladesh sorkar ngaihchan mek a nih thu a sawi bawk.
Meeting zawh hian Dr R Lalthangliana hian New Delhi-a Bangladesh High Commission pisa tlawhin an hotu pawimawhte nen border trade chungchang an sawiho.