Sorkar hnathawk leh mipuite inkarah Thawhhona ṭha siam a pawimawh - MP

Champhai district-a sorkar laipui sum hmanga hmasawnna hnathawhte zirchianga enfiahtu District Development Co-ordination & Monitoring Committee (DDCMC/DISHA) chu an chairman C Lalrosanga, Lok Sabha MP kaihhruaiin nimin khan an ṭhukhawm. MP chuan, sorkar hnathawk leh mipui aiawhte inkarah thawhhona ṭha zawk siam a pawimawh thu a sawi.

He hunah hian 2021-2022 financial year third leh last quarter bakah, 2022-2023 financial year first leh second quarter chhunga hmalakna hrang hrang thlirho a ni.

C Lalrosanga chuan, DISHA kaltlangin hmasawnna ruhrel siamte tluang taka thawh a nih theih nana inrawnkhawmna leh inpawhtlanna ṭha zawk siam zel tum a nih thu a sawi a,"Ramri depa awm Champhai district hi district pawimawh berte zinga mi a ni a, sorkar laipuiin hmalaknate uluk takin a vil reng a, a bikin ramri depa hnathawh leh thil thlengte a ngaihven zual," a ti a, NGO-te chu ram tana hna ṭha leh rotling siam a nih theih nan central scheme hmanga hnathawhte vilpuia ngaihven turin a sawm.

Ruihhlo tawlhruk ven kawnga Police, Excise, Assam Rifles leh NGO-te hmalakna fakawm a tih thu sawiin Lalrosanga chuan; NHIDCL hotute pawh hun bituk chhunga NH 6 kawng siam hna ṭha leh tlo zawka zo fel hman turin a chah a, sorkar department leh banker-te chu sorkar laipui scheme pawimawhte a chhawr ṭangkaitu tur mipuite hnena puangzar tam tur leh an chhawr ṭangkai ngei theih nana hma la turin a chah a ni.