Kolasib Hospital-ah Haemodialysis Unit hawng

Minister of state K Lalrinliana chuan nimin khan Kolasib DMS conference hall-ah 'Haemodialysis Unit' a hawng. Haemodialysis Unit hawn thar hi Mizoram sorkar hnuaia pangana a ni.

Hawnna inkhawm hi district bawrhsap John LT Sanga'n a kaihruai a; khuallian K Lalrinliana chuan khawl thar chu Kolasib district mipui zinga a mamawhte tan malsawmna leh damna thlentu a nih ngei a beisei thu a sawi.

K Lalrinliana chuan, district hospital thar changtlung zawk sak a nih theih nan a sakna tur lungphum phum thuai tura ruahman a nih thu a sawi a, "Kolasib district mipui bakah, district pawn lam aṭangte pawha damna beiseia Kolasib District Hospital-in pantu a nei ṭhin hi a lawmawm," a ti a, thawktute chu damlote tan taksa leh rilru damna thlentu ni zel turin a chah bawk.

John LT Sanga chuan hriselna neih pawimawh zia sawiin, heiselna chu hmasawnna tehfung pawimawh tak a nih thu a sawi a; Dr Lalrawngbawla Colney chuan Haemodialysis Unit chungchanga hriattur hrang hrang a tarlang.

He huna tarlan danin, Kolasib District Hospital-a Haemodialysis Unit hi sorkar facility hnuaia a pangana a ni. Haemodialysis Unit-ah hian dialysis tihna khawl pathum a awm a, heng khawlte hi Fairfax Foundation India kaltlanga ICICI Bank in an pek a ni.

Haemodialysis building sak nan hian Kolasib Bialtu MLA fund cheng nuai 14 hman a ni a, Mizoram Health System Strengthening Project hnuaiah RO system, power backup, computer, printer leh air-condition te dah nan cheng nuai sarih hman a ni bawk.