Lunglei district-ah thla 8 chhungin HIV vei thar 138 hmuh chhuah a ni

Lunglei District AIDS Prevention & Control Committee chu an chairman Kulothungan A, district bawrhsap kaihhruaiin nimin khan DC conference hall-ah an ṭhukhawm a, January-August, 2022 chhungin thisen test 5,267 zingah HIV positive 138 (2.62%) hmuh chhuah a nih thu tarlan a ni.

Kulothungan A chuan, Mizoram chu HIV/AIDS hluar berna state a nih thu a sawi a,"A pawi takzet a, HIV/AIDS dona kawngah mi tinte'n mawhphurhna kan nei ṭheuh a ni. Tun hnaia Lunglei district-a ruihhloa inchiu avanga ṭhalai HIV positive thar engemawzat an awm hi a veiawm takzet," a ti a, School Education department leh college principal-te nen ṭawngkawpin Lunglei district-a zirna-inah te HIV/AIDS awareness campaign nei thuai tura hmalak nghal anih tur thu a sawi.

AIDS Prevention & Control-a thawk-tute chu an mamawhte a hnena thlen vat tura chahin Bawrhsap chuan, a ṭul anga sorkar leh CST kaltlanga ngaihtuah pui nghal a tum thu a sawi bawk.

He huna tarlan danin, Lunglei district-ah antiretroviral therapy (ART) regular-a la mek mi 1,046 an awm a; kumin January aṭanga August thleng khan ICTC-a test mi 3,712 leh nu nau pai ICTC a test 1,555, an vaiin mi 5,267 thisen test aṭangin HIV positive thar mi 138 (2.62%) hmuh chhuah a ni.

Ṭhukhawm chuan Sub Hqrs YMA nena ruihhlo do kawnga hmalak te, zirna-in a HIV/AIDS awareness campaign neih te, damdawi mamawhte sorkar leh CSR kaltlanga ruahman te, Mizoram State AIDS Control Society (MSACS) nen ṭangkawpa zau zawka mipui zirtirna Information, Education & Communication (IEC) kawnga hmalakna neihte an rêl.

MSACS leh Central YMA ṭangkawp HIV/AIDS dona kawnga hmalakna ‘Zoram Harh Rawh Campaign’ chu Lunglei district-ah November 15-19, 2022 chhungin buatsaih ni se, Mizo hnam hla leh Mizo hnam lam intihsiakna neih turah HIV/AIDS awareness neih ni se an ti bawk