CADS nen thawhhona ṭha neih vangin END an lawm

Excise & Narcotics department (END) chuan thuchhuah siamin, Central YMA hnuaia ruihhlo do tura din, Central Anti Drugs Squad (CADS) te nen thawhhona ṭha tak an neih avanga lawmawm an tih thu an sawi.

Ruihhlo dona kawngah Central YMA OB pali leh member 54 te mahni inpein ram leh hnam humhalhna leh humhimna atan ṭhahnem ngai takin an thawk tih tarlangin END chuan, "Ruihhlo dona kawnga sorkar hnathawkte nena inpawhtlang taka thawhhona ṭha tak an neih avangin thlamuanthlak kan tiin, kan lawm hle. Chutihrualin, ruihhlo leh ruihhloa inhnamhnawihte dap chhuahna kawnga rilru seng ṭheuh tur leh chutiang kawnga thu hriat an neihte thawktute hnena hlan chhawng ṭhin turin Mizo mipuite kan ngen," an ti.

END tarlan danin, END leh CADS ṭangkawp chuan September 12, Thawhṭanni khan Bethlehem Vengthlang (Chite Road)-ah heroin gram 303 leh a neitu nia puh mi pathum - Lalvangi (52) Bethlehem Veng; Vanlalsiami (45) d/o Lalrintluanga, Bethlehem Vengthlang leh Lalnunsiami (32) d/o Biakcheuva, Zokhawthar a cheng nia inchhalte an man.