Ruihhlo zuarte hriattir turin ngen

Serchhip sub-divisional police officer (SDPO) Kaste Romalsawma chuan nimin khan thuchhuah siamin, Serchhip district-a ruihhlo zuar hriate chu rang taka Police emaw Excise department hnenah emaw hriattir turin a ngen a, an hming leh nihna thup sak a ṭul pawhin an thup sak dawn tih a tarlang.

SDPO chuan, rukruk leh midang kutthlak tum report nachang mipuiin an hria chu lawmawm a tih thu tarlangin,"Chutihlaiin mi thil ruk sa man tlawm zawka lo lei sak erawh kan tim lo viau si niin a lang. Ruk a ni tih ringhlel chunga mi thilruk lo lei sak hi dan kalh a ni a, lungin tan leh pawisa chawi theihna a ni," a ti a, hre lo anga mi thilruksa leitute chhuanlam chu Police-te'n an pawm loh thu a tarlang bawk.

SDPO tarlan ṭhenkhat

# Gas bur, tui meter, silai leh thil dang, company emaw sorkar thu loa lei leh hralh thiang lo bungrua a awm tih hi mipui hriatsaa ngaih a ni a, chutiang lo leitute chuan dan an pawisa lo a, a titute chu man nghal zel an ni ang.

# Ruihtheihthil tih chingte'n bungrua a man pangngai aia tlawm lutuka an zawrh lo leitute pawh thil ruk an lo lei a nih chuan an thil lei chhuhsak bakah, anmahni pawh man nghal zel an ni ang.

# Thil ruk hian huan thlai rah te, dil sangha te leh lo lam aṭanga tharchhuah thilte a huam vek a ni.