RAT hmangin Covid-19 vei 91 hmuh belh

September 12, Thawhṭanni khan Mizoramah Covid-19 vei mi 91 hmuh chhuah a ni a, nimin khan hripui vei dam tawh mi 65 chhuahtir an ni. Covid-19 vanga thi an awm belh lo a, nimin tlai khan Covid-19 positive enkawl lai mi 256 awmin, an pung leh hret.

Thawhṭannia hripui vei hmuh thar mi 91 chu mipa 46 leh hmeichhia 45 niin, RAT hmanga hmuh chhuah vek an ni a, swab sample 703 endik aṭanga positive zat chu 12.94% a ni.

Nimin khan hripui vei dam tawh mi 65 an chhuak a; district hrang hranga chhuak zat chu - Aizawlah 18, Saitual leh Lungleiah 13 ve ve, Mamit leh Lawngtlaiah paruk ve ve, Khawzawl leh Hnahthialah pathum ve ve, Serchhipah pahnih leh Champhaiah pakhat an ni .

IDSP record angin, Mizoramah Covid-19 vei 2,37,846 hmuh chhuah a ni tawh a, mipa 1,10,781 leh hmeichhia 1,27,065 an ni a, mipa aiin hmeichhia 17,065-in an tam zawk. Nimin tlai dar 5 thleng khan mi 2,36,868 (99.59%) chhuahtir an ni tawh a, mi 722 (0.30%) thi tawhin, enkawl mek mi 256 (0.11%) an awm.

Kum 2011 chhiarpui angin, Covid-19 vei hmuh tawh 2,37,846 chu state mipui zat aṭangin 21.80% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.