KHAWTHLIR

LMC inthlan atan Roll ennawn dawn
Lunglei Municipal Council (LMC) inthlan buatsaih tur atan Mizoram State Election Commission (SEC) chuan electoral roll revision a buatsaih dawn. Roll revision atan hian September 23, 2022 ah draft roll tlangzarh a ni ang a, sawisel leh siamṭhat duh neite tan September 30 thleng hun hawn niin, hengte hi October 7, 2022 chhunga chinfel a ni ang. Final roll chu October 14, 2022 ah tlangzarh tur a ni.

MLA-in tlawh
Aizawl West-III bialtu MLA VL Zaithanzama chuan a bial chhunga Govt. Johnson College chu nimin khan a tlawh a, thawktute chuan an mamawh hrang hrangte an lo thlen. MLA chuan college-a thawktute'n an mamawh an lo thlente chu a theih anga tihhlawhtlinsak a tum thu a sawi.

Tlantir dawn lo
Lunglei District Transport Officer chuan thuchhuah siamin, sorkar chawlh (holiday)-ah Lunglei khawchhungah MST bus tlântir a nih tawh dawn loh thu a tarlang. DTO tarlan danin, July-August, 2022 chhung khan Lungleia MST bus tlanna aṭangin sorkarin hlêp a nei lo a, a chawi belh zawk. Pukpuia MST bus tlân dan tur pawh siam thar a ni a, September 2022 chhung enchhin a ni ang.

Ruihhlo sawiho
Lawngtlai additional DC James Miahlung kaihhruaiin nimin khan DC conference hall-ah sorkar department leh tlawmngai pawl hrang hrang aiawhte'n Lawngtlai district-a ruihhlo zawrh, hman khaw lohna leh chhiatna a thlente tih tlem dan tur an sawiho.

Chawimawina hlan
ZPM Ṭhalai chuan nimin khan an party pisa-ah All India Football Federation executive member atana thlan tlin Lalnghinglova Hmar, MFA honorary secretary chu chawimawina an hlan. ZPM Ṭhalai vice president Dr C Lalrammawia chuan Lalnghinglova chu an chhuan thu leh an lawmpui thu sawiin, "Ṭhalaite tana a hmalâknate kan ngaihsan avangin vawiin hun hi buatsaih kan ni," a ti.