Chhiatna a thlen thulha thawktute biak pawhna tur Chief Minister-in a tlangzarh

Chief minister Lal Thanhawla chuan, nimin khan CMO conference hall-ah chhiatrupna a thlen thulha chhanchhuah hna thawktute biak pawh theihna tur, Aizawl DDMA App tlangzarh a; chhiatna a thlena chhanchhuahna hmanrua leh damdawi phurhna lirthei Emergency Response Vehicle (ERV) a vai liam bawk.

Chief Minister chuan, Mizoram chu lirnghing thlen theihna hmun hlauhawm zual, leimin leh tuilian vanga harsatna a lo thlen fona a nih avangin mipuite an inrálrin bik a ngai tih sawiin, "Tunlai thiamna hmang ṭangkaia Mizoram mipui, mobile phone hmangtu nuai 10 chuang zette'n an ṭangkaipui tur Aizawl DDMA App siam a ni a ni hi a lawmawm hle a ni," a ti a; application buatsaih thar chu mobile phone nei zawng zawngin an phone-ah an dah a, hman a ṭul huna hman ṭangkai a pawimawh thu a sawi.

Chhiatna thlen theihna hmunah Mizoram a awm a vangin sorkarin awmze nei zawkin a hun leh hmunin a phût anga hmalakna kalpui a nih theih nan theihtawpin hmalak mek a nih thu sawiin Lal Thanhawla chuan, "Chhiat tawk te, in leh lo chánte pawhin ṭanpuina an dawn theih nan Central team-te hmuh theih tura thlalak leh video-te lo nei lawk turin DC-te hriattir an ni tawh," a ti.

Inkhawmah hian ADDMA App siam dan leh hman ṭangkai theih dante Aizawl DC Kannan Gopinathan-a'n a sawifiah. ADDMA App hi android hmang smartphone neitute tan Google Playstore-ah 'Aizawl DDMA' tiin zawn hmuha download theih a ni.

ADDMA App-ah hian My Zonal Officer tih hmehin chhiat tâwk leh ṭanpui ngaite tan an awmna bial viltu, officer incharge-te phone hmangin biak theih a ni a, mi dang harsatna tâwkte chanchin/dinhmun pawh a thlen theih a ni.

Notification-ah chahchin pawimawh - khawchin, kawng dinhmun, etc. te a dawn theih a, report incident-ah thuneitute hriat tur thil thleng a thehluh theih. Important contact-ah phone number biak pawh tur pawimawh zual dah a ni bawk.

Chief Minister-in a vailiam tâk ERV chu Powergrid Corporation of India-in corporate social responsibility (CSR) kaltlanga cheng nuai 20 a thawh hmangin Aizawl DC office-in an lei a ni a; chhanchhuahna hmanraw chi kimin an thuam a ni.