Thla 3 chhungin sikserh vei mi 3,035

National Vector Borne Diseases Control Programme (NCBDCP) chuan, nimin khan NLUP conference hall-ah ni hnih awh tur State Quarterly Review Meeting an buatsaih a, April-June, 2017 chhungin Mizoramah sikserh (malaria) vei mi 3,035 hmuh chhuah a nih thu tarlan a ni.

Review meeting hi NCBDCP state programme officer Dr HC Thangkima'n a kaihruai a; NHM mission director Dr Lalrozama khuallian a ni a, Health ministry-a regional director Dr Ashananda Singh chu khualzahawm a ni. NCBDCP state programme officer Dr HC Thangkima'n Mizorama sikserh dinhmun tlangpui a sawi.

Dr HC Thangkima sawi danin, kumin April-June chhung khan Mizoram pumah mi 1,10,967-te thisen endik niin, chu'ng zinga mi 3,035 chuan sikserh an vei tih hmuh chhuah a ni a; sikserh vei zinga mi 2,607 chuan malaria PF an vei. Lawngtlai, Lunglei leh Mamit district-te chu Mizorama sikserh tam zualna district a ni.