Education Minister-in Shillong MSU Freshers’ Day hmanpui

School Education minister H Rohluna chuan nimin khan Shillong-a U So So Tham Auditorium-ah Mizo Students’ Union, Shillong 38th. Annual Freshers’ Day a hman-pui a; ZONET Cable TV managing director RK Lianzuala pawhin khualzahawm niin a hmanpui.

H Rohluna chuan, Shillong MSU member-te chu an chhungte'n Shillong-a an dah chhan hre reng tura chahin, "Mi tam takin awt ru takin an thlir che u a, ṭhahnemngai taka inzir a ngai a ni. All India level intihsiaknaah tun hnaiah Mizo hming a lang tlem a, zirna-in ṭhaah Mizo hming a lang tlem hle bawk a, rualawh a ná a, zirlaite tan ṭan lak a ngai hle a ni," a ti.

Social media lâr zelin lehkhabu ṭha chhiarna hun tam tak a la hêk tih sawiin H Rohluna chuan, "Hei hian kan society a hruai sual mek a, kawng dik kan zawh leh vat a ngai a ni," a ti. Zirlaite chu mi dangte belh tlak leh chhawr tlak thiamna nei tura chahin, "Mizo zirlaite'n mark sang tak hmu turin zirlai kan hneh tawk lo fo a, ṭan kan lak nasat a ngai hle a ni," a ti a; Shillong-a Mizo zirlaite chu ram leh hnam leh chhungkaw tana hman tlak nih tum turih a fuih.

Khualzahawm RK Lianzuala pawhin fuihna thu sawiin, zirlaite chu tun aṭanga kum 10 chhunga an hunte hmang ṭha turin a chah a; zirlai nih laia nun khawlo laklawh tawhte tan nun pangngaia lêt leh a harsa ṭhin tih sawiin, "Thil ṭha lo laka insûm tlat a ngai a, chhel a ngai. Kawngkal neia lehkha zir a ngai a ni," a ti.