KHAWTHLIR

CM-in hlan
Mizo Zaimi Inzawmkhawm (MZI)-in Chief Mnister's Felief Fund-a an chhûn luh Rs. 1,50,000 chu chief minister Lal Thanhawla'n tun hnai khan Tlabunga tuilian tuarte ṭanpuina atan Lunglei DC Lalzarmawii hnenah a hlan.

GST zirho
Taxation department chuan, nimin khan Kolasib IPR conference hall-ah sorkar hnathawk leh sumdawngte tan Goods & Services Tax (GST) zirna an buatsaih. Training hi Kolasib Zone chhunga mite tan buatsaih a ni a, chawhma lamah sumdawngte zirtir niin, chawhnu lamah sorkar office-a hotute zirtir an ni.

Ruang hmu
August 26, Inrinni chawhnu dar 2 vela Tuichang luia tla Lalhmunsangi (36) d/o Lal-chungnungi, Khawzawl Zuchhip Veng ruang chu nimin tlai dar 3 vel khan a tlakna Tuichang luiah hmuh a ni. Lalhmunsangi hi Mangpui rama a riak haw lam Tuichâng lui kânna leiah chesualin tuiah a tla nia hriat a ni.

NLUP sem
Commerce & Industries department chuan, nimin khan Kolasib-a Shopping Centre conference hall-ah NLUP ṭanpuina an sem a, bialtu MLA PC Zoram Sangliana'n a hmanpui. Ṭanpuina hi Kolasib biala khaw 11-a mi 66 hnenah cheng nuai 32.7 sem a ni.

Kawng siam
Mizoram Tipper Association (Driver's & Owner's), Kolasib branch chuan nimin khan Bilkhawthlir to Zukbual inkar kawng chhe zual lai an thawm ṭha. Kawngpui thawm ṭhatnaah hian tipper neite'n an thawh chhuahpui a, lung tipper phur thum hmangin kawng khuar zual lai an hnawh a ni.

Naupang su hlum
Nimin chhun dar 11 vel khan Chaltlang Field bulah Mahindra XUV car-in Vanlalkhawngaihi (3) d/o Lalbiakzuali, Chaltlang chu a chîl palh a, naupang hi a hmunah a thi. Thu dawn danin, motor khalhtu hi Lalṭhuamluaia, College Veng, Aizawl a ni a, Tourist Lodge, Chaltlanga mikhual lam tura kal a ni.