JE-te'n an dinhmun siamthat an phût

Junior Enginner Service Association of Mizoram (JESAM) chuan, kaisang kher loa Non Functional Grade Pay hman phalsak turin nimin khan Finance minister Lalsawta hnenah dilna an thehlut. An thil phût nawrna atan hian nimin aṭang khan badge dum an bel a, ni thum chhung an bel dawn.

Finance Minister hnena lehkha an theh­luhah JESAM chuan, Mizoram sorkar hnuaia thawk zingah JE-te chu inhnawhkhawm (stagnation) vanga kaisang thei lo tamna ber a nih thu leh, dan anga an tana kaisan theihna kawng awmah JE-a lut zinga kaisang ve thei lo tur leh an service ngaia pension-a chhuak tur mi 245 an awm thu an tarlang.

JESAM tarlan danin, tun dinhmunah department hrang hrang - PWD, P&E, PHE, Agriculture, Minor Irrigation, Rural Development, UDPA, Soil and Water Conservation, Local Administration, Aizawl Municipal Corporation, Lai Autonomous District Council leh DRDA-ah JE thawk lai mi 575 an awm a; Non Functional Grade Pay hman phalsak an nih chuan mi 332-in an chhawr nghal dawn a ni.

JE zingah senior tawh tak tak an awm avangin sorkarin sum a sen belh tur a tam lo a, thla khatah Rs. 12,40,782 vel sen belh turah an ngai. Post thar siam belh emaw, an mawhphurhna tihdanglam emaw kher a ngaih dawn loh avangin sorkar tan harsatna a thlen phah lo turah an ngai bawk.

JESAM hruaitute chuan, an thil phût chu kum 2015 tawp lam khan Chief Minister an sawipui tawh a, kumin April thlaah Finance Minister hnenah ngenna an lo thlen tawh bawk tih an sawi a, "DPAR lamin a zir chiannaah pawh kan thil phût hi âwm min tihpui a, anmahni anga service dang harsatna neite'n an thîk hlauhthawn thuah Finance department a paltlang zo ta lo niin kan hria," an ti.

An serive rules-ah JE-te tan 35% bak kaisan theihna a awm loh avangin kum 30 thawk tawk zingah pawh tun thlenga la kaisang lo mi 10 vel leh kum 20 chuang thawk tawh la kaisang lo mi 249 an awm nia sawiin, "An kaisang thei lo a nih pawhin an mawhphurhna leh hnathawh a danglam chuang lo," an ti a; an kaisanna tur tlukpui grade pay hman ve chu an duh ber a nih thu an sawi.

JESAM hruaitute'n an thil phût chungchang Finance Minister an sawipui lai hian an member-te chu Secretariat Complex-ah badge dum belin an pungkhawm a; ni thum chhung badge dum an belin awmzia a neih loh chuan a ṭul anga hmalak zel an tum a ni.