Aizawl DTO (Rural) hawn thar a ni

Aizawl district chhung­a Aizawl Municipal Corporation (AMC)-in a huam loh zawng tuam tur, Aizawl District Transport Office (Rural), Chal­tlanga mi chu nimin khan Transport minister John Rotluangliana' a hawng.

Transport Minister chuan, Aizawl DTO (Rural) hawn thar a ni chu department hmasawnna pakhat a nih thu sawiin, "Aizawl DTO indaih lohna pawh a ziaawm phah sawt a, a dawrtu mipui tan awlsamna a thlen ka beisei," a ti a; DTO (Rural)-a thawktute chu ṭha taka bul ṭan a, mipui tan dawr nuam tak nih tum turin a chah.

John Rotluangliana chuan, Transport department chu department pawimawh tak, sorkar sum béla sum chhûng lût hnem ber zinga mi a nih thu sawiin, "Mipui rawngbawltu kan nihna hre reng chunga taima leh rinawm taka hna thawh a pawimawh. Mizoram hi kan kalphungah inhriatthiamna nen kan kal nasa ṭhin a, dan anga kal kan ngaih pawimawh tel a ṭul," a ti.

Transport Minister hian district tin DTO-a hman tur vehicle registration software Vahan 4.0 tlangzarh nghal a ni.

Aizawl DTO (Rural) siam hnu hian Aizawl khawpui, AMC huam chin chu Aizawl DTO (Urban)-in a huam dawn a; a bak Aizawl district chhunga khua zawng zawng chu DTO (Rural)-in a tuam ang a, lirthei ziah luhte chu MZ-09 code pek a ni ang.

Vahan 4.0 hi Ministry of Road Transport and Highways-in India ram puma hman tura a duan a ni a, kum 2003 khan software pahnih - Vahan leh Sarathi hi Aizawl DTO-ah NIC kaltlanga hman ṭan a ni. Version thar zawk Vahan 4.0 leh Sarathi 4.0 te chu hmang vek turin inpuahchana a kal mek a; Vahan 4.0 chu state 21-in an hmang tawh a, Sarathi 4.0 chu state 20-in an hmang tawh thung.