New Indian Movement zirho a ni

Krishi Vigyan Kendra (KVK), Serchhip district bultumin nimin khan New Indian Movement (Sankalp Se Siddhi) zirhona buatsaih a ni a, MLA Vanlalawmpuii Chawngthu-in a hmanpui. Hnahthialah pawh zirho a ni a, Assembly speaker Siphaia'n a hmanpui a ni.

Vanlalawmpuii Chhawngthu chuan, India ram thar siam turin mipuite ṭan­rualna a pawimawh tih a sawi a, "Hlawh hmuhna satliah mai ni loa tih tak taka hna thawh a ṭul. Kut hnathawktu nih hi a zahthlak loh tih kan hriat thar a ṭul a, sorkar lama kan hotute kutah innghat mai lo a, kan tih theih apiang kan tih ve hi hma kan sawn tlanna tur a ni," a ti.

Sorkar hotute zarah kut hnathawk­tute'n hmanraw ṭha leh changkang an hmang mek tih sawiin Vanlalawmpuii chuan, "Ṭanpuina eng pawh kan dawn apiang chu a nihna tur taka hmangtu nih zel i tum ang u," a ti a; sorkar department lama thawkte leh mipuite an ṭan tlan phawt chuan India ram thar siam theih ngei a nih thu a sawi.

Inkhawm kaihruaitu, Serchhip DC Sangchhin Chinzah chuan, buh leh bâl tharte kum 2022-a a let hnih a tihpun sorkar laipuiin a tumna chu New India Movement hnuaia hma­chhawp pawimawh tak a nih thu a sawi.

Sankalp Se Siddhi zirhonaah hian Agriculture, Horticulture, AH&Vety, Soil & Water Conservation, Fisheries leh Sericulture department hotute'n kum 2022-a thar chhuah a leta a pun theihna tura an hmalakna hrang hrangte an sawi a ni.

Nimin vek khan Hnahthial community hall-ah KVK, Lunglei district buatsaihin New Indian Movement zirhona buatsaih a ni. Khuallian, speaker Hiphei chuan, ram ṭha leh nuam zawk din turin tumruh a ngai tih sawiin, "India ram thar din tura hmalakna hrang hrang tihlawhtling tur chuan firfiaka chêtna, sakhaw inlâk hranna, chi bing leh hnam bil inthliarhrannate ûmbo a ngai," a ti a; hlawhtling turin ṭanrual a pawimawh thu a sawi.

Inkhawm hi KVK-a senior scientist Dr Lalmuanzovi'n a kaihruai a, scientist Dr H Vanlalhmukima'n Prime Minister thuchah a chhiar a ni.