Tlawnga truck tlaah mi pahnih bo

Nimin chhun dar 12 pelh khan Sairang Buichali lei chhakah 709 truck, Sairang lam aṭanga tlan chu kawng chhia a hêlna lamah chesualin, Tlawng luiah a tla a, a chuang mi pasarih zinga pahnih chu he thu ziah lai thleng hian hmuh an la ni lo.

Sairang police-te sawi danin, truck AS-11 TC 1434 ah hian hnam dang vek an chuang a, a khalhtu chu Khutub Uddin a ni. Mi panga chu Tlawng lui aṭangin kawngah an vak chhuak a, pahnih erawh chu hmuh zui an ni rih lo. La hmuh lohte hi driver dang Islam Uddin leh Molik Uddin, Sonatola, Ka­rimganj district-te an ni.