ZPM Ṭhalaiin Covid-19 dona sum langtlang taka hman an phût

Zoram Peoples' Movement (ZPM) Ṭhalai chuan thuchhuah siamin, Co­vid-19 donaah thawhhona ṭha a awm nan sorkar sum hmante chu langtlang taka hman ni se an duh thu leh an phût thu an tarlang.

ZPM Ṭhalai chuan, "Ram hruaitu te, pawl leh mipui inkarah thawhona ṭha lehzual a awm theih nan leh ṭangkai leh langtlang taka Chief Minister's Relief Fund, sorkar laipui leh state sorkar sum aṭanga Covid-19 dona tura sum awmte hman a nihna turin opposition MLA-te telna committee din turin sorkar a ngen. Hei hian department aṭanga sum kal leh MLA-te'n an fund an hmanna turah pawh inzài tawnna (coordination) ṭha tak a siam ngeiin a rinawm," an ti.

ZPM party ṭhalaite chuan, Coronavirus (Sars-CoV-2) hri darh mek laka invèn nan mi tlawmngai ṭhahnem takin ramria inkalpawhna kawng leh ramhnuaiahte chhel takin ram venhim hna an thawh mek thu sawiin, local task force hrang hrangte inpekna ropui an tih thu an sawi a ni.

Eizawnna hna thawh theih a nih loh vanga chhuanchham an awm lohna tura ram hruaitu, sorkar hnathawk, kohhran, pawl leh mimal ṭhahnem takin CM Relief Fund-ah sum an thawh chu lawm­awm an tih thu sawiin ZPM Ṭhalai chuan, "Thingtlanga thlai thartute'n beisei lêt nei loa an thlaite khawpuia awmte an pe ṭhin leh khawpuia task force-te'n a thlàwna dawn duh bik loa sum leh thil danga an do lêt ṭhinte hian Mizo nih a nawm­zia a takin min hmuhtir a ni," an ti.