Parliamentary secretary pasarihte'n CM hnenah bànna an thehlut

Mizoram sorkara parliamentary secretary pasarihte chuan nimin tlai khan chief minister Lal Thanhawla hnenah bânna an thehlut. Mi pasarihte hi an awmna, Congress party-ah general secretary atan nimin vêk khan ruat an ni.

Nimina parliamentary secretary aṭanga bânna thehluttute chu - KS Thanga, Lt.Col. ZS Zuala, H Zothangliana Joseph Lalhimpuia,, TT Zothansanga, Hmingdailova Khiangte leh K Lalrinthanga te an ni.

Parliamentary secretary aṭanga báng ta mi pasarihte hi MPCC president Lal Thanhawla chuan nimin vek khan an party general secretary atan a ruat vek a; anni bakah hian, MLA dang pahnih - Lalrinliana Sailo leh Nihar Kanti Chakma-te chu general secretary atan ruat an ni bawk.

MPCC general secretary atana mi pakuate ruatna order-ah chuan, "Nakkum 2018 hi Mizoram General Assembly Election a lo ni dawn ta a. Kan party-in chak zawka hma a lak theihna tur atan heng kan hotute hi general secretary atan ruat an ni. An term chu tuna term ding lai ang hi a ni ang," tih a ni.

Bânna thehluttute zinga mi, Joseph Lalhimpuia chuan Vanglaini palai zawhna chhangin, parliamentary secretary pasarihte chuan nimin tlai dar 3:30 khan Chief Minister hnenah bànna an thehluh thu a sawi a, "Lungrual tak leh hlim takin bànna kan thehlut a ni," a ti.

Joseph Lalhimpuia chuan bânna an thehluh chhan sawiin, Supreme Court-in state sorkarte anmahni thua parliamentary secretary a dah theih lohna tur thupek a chhuah vang a nih thu a sawi a, "Dan siamtu kan ni a, Supreme Court order hi kan zawm a ngai a ni," a ti a; chutih rualin, Supreme Court order chu an la hmuh loh thu a sawi.

Supreme Court judge Justice J Celameswar leh Justice Justice AM Sapre-te Bench chuan July 26, 2017 khan order chhuahin, Assam state sorkarin parliamentary secretary a ruatna dan, Assam Parliamentary Secretaries (Appointment, Salaries, Allowances and Miscellaneous Provisions) Act, 2004 chu Constitution kalh a nih thu a puang.

Supreme Court Bench order hian India ram pum a huap angin, India rama state sorkara parliamentary secretary nei dangte pawh a huam a; Mizorama parliamentary secretary-te pawh a huam a ni. India ramah parliamentary secretary nei state an awm nuala thu dawn a ni.

Parliamentary Secy.-in minister an puihte:
Parliamentary Secy. Minister puih
KS Thanga Lalsawta
Col. ZS Zuala R Lalzirliana
H Zothangliana R Romawia
Joseph Lalhimpuia H Rohluna
Hmingdailova Khiangte Zodintluanga
TT Zothansanga John Rotluangliana
K Lalrinthanga PC Lalthanliana