ACBOA-in bus enkawltute Breath analyser an hamtir

Aizawl City Bus Owners' Association (ACBOA) chuan, nimin khan Aizawl Civil Hospital thlanga city bus stand-ah city bus driver leh conductor-te zu in an awm leh awm loh an enfiah a, breath analyser an hamtir.

ACBOA chuan thu­chhuah siamin, thla khatah vawi hnih/thumte mobile checking an nei ṭhin tih tarlangin, "Breath analyser hmangin driver leh conductor-te'n zu nam/rûi chunga city bus an khalh leh khalh loh leh, conductor zingah zu nam leh rui an awm leh awm loh an enfiah ṭhin a ni," an ti.

ACBOA hruaitute sawi danin, dan bawhchhiaa zu nam leh rui chunga city bus khalh leh enkawl an hriat chhuahte chu an pawl dan angin an thunun ṭhin a, suspend thlengin action an la ṭhin. Driver leh conductor-te licence leh bus document-te an endik ṭhin bawk a; dan bawhchhiate chu an dan bawhchhiat azirin an hrem ṭhin a ni.

ACBOA hruaitute chuan, passenger-te himna an ngai pawimawh ber tih sawiin, "Him taka passenger-te an awm theih nan theih tawkin hma kan la ṭhin a. City bus service chungchanga lungawi lohna leh rawtna nei chuan ACBOA office-ah hriattir reng theih a ni," an ti. Hriattir theihna phone number-te chu 2323957 leh 9436199682 a ni.