Mizoramah Rs. 200 note a la thleng lo

Reserve Bank of India (RBI)-in August 25, 2017-a a tlangzarh tâk Rs. 200 note chu Mizoramah a la thleng lo a, September thla tawp lamah a thlen beisei a ni.

Vanglaini palai zawhna chhangin SBI hotute chuan, tun dinhmunah Mizoramah pawisa awm a tam tawk tih an sawi a, "Rs. 2000 note tihnawina turah harsatna awm ṭhin pawh Rs. 500 note kan ngah tâwk avangin harsatna a awm lo. RBI kaltlangin September thla tawp lamah pawisa chah a ni ang a, chumi rual chuan Rs. 200 note pawh a lo thleng ang," an ti.

SBI hotute sawi danin, Rs. 200 hi Mizoramah la thleng lo mah se, state dang aṭanga Rs. 200 mimalin an dawnte chu Mizoramah pawh hman theih vek a ni.

Rs. 10 thîr (coin) chu bank-ah dah luh theih reng a nih thu sawiin, "Bank ṭhenkhatin an pe chhuak lo a, kan hnenah an rawn deposit leh ṭhin avangin Rs. 10 thîr hi kan khâwl hnem tawh hle. Bank counter-a Rs. 10 thîr dawng duh lo an awm a, complaint a awm chuan hrem theih an ni. Rs. 10 note hi khawi hmunah pawh hman theih tura tih a ni," an ti.