Kawng siam ṭhat a nih loh chuan Bairabi-ah truck an tlân dawn lo
Mizoram Truck Owners' Association (MTOA) leh Mizoram Truck Drivers' Association (MTDA) chuan thuchhuah siamin, Aizawl-Bairabi inkar kawng chu September 10, 2017 thlenga siam a nih loh chuan an truck-te tlantir an tum tawh loh thu an tarlang.
MTOA leh MTDA chuan, sum leh tha tamtak sengin Mizoram mipui eibar lak luhna, Bairabi kawng chu an siam ṭhin tih an sawi a, "Mahse, hna bera kan neih theih loh avangin tun dinhmunah tlan ngam loh khawpin a lo chhe ta a. Kan motor-te a chhiat nasat avang leh a khalhtute nunna atan pawha a hlauhawm avangin tlan ngamna chi-ah kan ngai tawh lo a, September 10 thleng sorkar kan ngaichang ang a, motor lian rit phur tlan ngama siam a nih loh chuan tlan kan tum ta lo tih kan puang ni," an ti.
FCSCA carrying contractor-te hnuaia buhfai an phurh mek chu Zoram hmun hrang hranga kawng chhe nasa vanga motor chhiatna leh, a phurh man a inman loh thu tarlangin MTOA leh MTDA chuan, "Sorkarin tender thar a chhuah a, phurh man sang zawka kan phur thei dawn a nih loh chuan September 1 aṭang chuan kan phur tawh dawn lo," an ti a; an lirtheite a din vanga ei leh bar harsatna a thleng a nih pawhin hrethiam turin Mizoram mipuite an ngen a ni.