Kolasib-ah Reserve Voluntary Force din

Kolasib district chhunga ramri hrúla duty turin Kolasib DC kaih­hruaina hnuaiah Reserve Voluntary Force (RVF) din a ni a, chuta tan chuan Kolasib-a YMA branch hrang hrang aṭangin mi 456 an inpe. RVF-te chu ramri hrúla duty-te a ṭul hun apiangah thlâk thei tura ruahman a ni.

Kolasib DC Dr H Lalthlangliana chuan, RVF an din chu enkawl turin Border Safety Monitoring Team an din thu Vanglaini palai a hrilh a; Team-ah chuan magistrate, police leh YMA Sub-Hqrs. hruaitute an tel thu leh nimin khan a vawi khatna atan an ṭhutkhawm nghal thu a sawi.

Kolasib Bawrhsap chuan, RVF-ah hian YMA member bakah, sipai báng te, NCC lam mite an inpe nual tih a sawi a; an din chhan sawiin, "Mimal leh pawlin anmahni remchan dan anga ramri hrúla an duty tur, awmze nei zawka kalpui nan a ṭangkai beisei vang a ni," a ti. Border Safety Monitoring Team-in a khát tâwkin ramri hrula duty-te an enfiah ang a, duty dan leh mihring mamawh zat leh ei leh in an mamawh dante an enfiah ṭhin dawn tih a sawi bawk.