Zir chiannaah zu zawrh duh 26.03% Zu khap bur duh 63.30% an awm
Mizoram Presbyterian Kohhran Synod Social Front-in zu chungchang an zir chianna leh mipui ngaihdan an laka zawhna chhangtu 63.30% chuan zu khap bur ṭha an ti a, zu thlah zalen ṭha ti 26.03% an awm.
'Zuin Mizote min nghawng dan' tih zir chianna bu, tun hnaia tihchhuah takah chuan, zir chiannaah hian mi eng emaw zat an mimal ngaihdan zalen taka zawh an nih thu an ziak a; zir chiangtu Study Committee-a convener chu Lalzuitluanga a ni.
Member dangte chu - Synod Social Front coordinator H Lalhmingmawia, Central YMA president Lalbiakzuala, Peter Zohmingthanga, Dr Zoengpari, Dr James LT Thanga leh Lalremruati Zote-te an ni a; anni hian phungbawmah Dr Lalchhanhima Ralte leh Dr Mary Ann Halliday-te an sawm bawk.
Study team hian investigator atan mithiam leh tawnhriat nei tawhte an ruat leh a; investigator-te chuan MLPC Act hmanna district khaw hrang hrangah kalin, mi eng emaw zat chu zawhna chi hrang hrang an zawt.
Zawhna chhangtute chu sorkar hnathawk, sumdawng, mi hnuaia inhlawh, zirlaite leh sumdawnna lirthei khalh-tute, an vaiin mi 872 an ni.
Kum 25 hnuai lam mi 105, kum 25-35 inkar mi 196, kum 35-45 mi 193, kum 45-55 mi 162, kum 55-65 mi 116 leh kum 65 chung lam mi 100 an ni a; mipa 586 leh hmeichhia 286 an ni.
Zirchiannaa a lan danin, zawhna chhangtu mi 872 zinga 63.30% chuan zu khap bur ṭha an tih laiin, 26.03% chuan zu thlah zalen ṭha an ti a; ngaihdan nei lo 10.67% an awm.
Zawhna chhangtu zinga zu in ṭhin zinga 65% chuan kum 16-25 inkar an nih laiin zu an in ṭan. Hetiang hian zu in ṭan hun thliar a a ni: kum 16 tlin hmaa in 10.02%, kum 16-20 inkara in ṭan 38.59%, kum 21-25 inkara in ṭan 26.44%, kum 26-30 inkara in ṭan 11.73%, kum 31 tlin hnua in ṭan 13.22% an ni.
Zu-in chhungkua a nghawng dan zawhnaah, zawhna chhangtu zinga 40.6% chuan zu vangin an chhungkuain harsatna an tawh phah tawh ṭhin tih an sawi a; chutih laiin, zu vanga chhungkuaa harsatna la tâwk lo 59.4% an awm.
Zu vanga chhungkuaa harsatna tawk zinga harsatna an tawh chhan tam ber chu - inhnial buaina leh inrem lohna a ni. Zu vanga kut inthlakna thleng ṭhina sawitu 5.44%, chhungkaw inhuatna 1.61%, inṭhen darhna 5.74% an awm.
Chhungkaw member zingah zu leh ruih theih thil kaihhnawiha nupa inṭhen an awm thu 13.4%-in an sawi a, 85.3%-in an awm loh thu an sawi thung. Zu in vanga chhungkaw sum lak luh tlem phaha hria 43.7% an awm a, sum lak luh tlem phaha ngai lo 27.8% an awm.
Zu in mi awmna chhungkuaah zu in vanga chhungkuaa sum thehluh a tlem phah tih sawitu 43.7% an awm a, thla khata sum an sen zat chawhrual chu Rs. 7,058 a ni. Zu man atan thla khataah Rs. 1,000 aia tlem hmang 40.75%, Rs. 1,000 - Rs. 2,000 inkar hmang 27.35%, Rs. 2,000-3,000 inkar hmang 12.60% leh Rs. 3,000 aia tam hmang 19.30% an awm a ni.
Mitthi zat atanga
Zu kaihhnawiha thi
Kum Zu kaih-
hnawiha thi
2013 16.32%
2014 9.86%
2015 17.19%
2016 23.38%
Note: Table/data hi Aizawl Civil Hospital, Synod Hospital, New Life Hospital leh Aizawl Hospital record aṭanga chhût a ni